Фудбалерите на Арсенал без никакви проблеми се пласираа во осминафиналето на ФА Куп, откако на домашен терен убедливо го совладаа Виган со 4-0. Лидерот во Премиер лигата пред неколку дена одигра 1-1 против Брентфорд во шампионатот и му дозволи на Манчестер Сити да се доближи на четири бода, но вечерва избраниците на Микел Артета ја демонстрираа својата моќ против третолигашот. И покрај ротациите, „топчиите“ повторно излегоа со исклучително силен состав и го решија прашањето на победникот уште во првото полувреме.Арсенал поведе во 11. минута кога Еберечи Езе маестрално реагираше на средината од теренот и испрати одличен пас кон Нони Мадуеке, кој излезе сам по десната страна и рутински реализираше за 1-0. Само седум минути подоцна, повторно Езе беше креатор овојпат со прецизна топка кон Габриел Мартинели на левата страна. Бразилецот избега од своите чувари, влезе во казнениот простор и сигурно погоди за 2-0.Во 23. минута Мадуеке и Букајо Сака комбинираа по левата страна, Сака ја заврте топката во петерецот, каде што по мешаницата дефанзивецот Хант несреќно ја смести во сопствената мрежа за 3-0. Одбраната на Виган делуваше дезорганизирано, а тоа Арсенал повторно го искористи во 27. минута. По долгата топка од центарот, Норгард го пронајде Габриел Жезус, кој излезе сам пред голманот Тикл и со елегантен лоб-удар постави убедливи 4-0.Во второто полувреме Арсенал го намали интензитетот, немаше нови погодоци, а тимот на Артета сигурно продолжува понатаму, задржувајќи ги амбициите за освојување на сите трофеи оваа сезона.